विश्वास – गतिमंद मुलांसाठी कार्यशाळा

विश्वास चॅरिटेबल ट्रस्ट संचलित विश्वास–गतिमंद मुलांसाठी कार्यशाळामध्ये १८ वर्षांवरील गतिमंद मुलांना सुप्त गुणांना वाव देण्यासाठी व त्यांना कार्यक्षम करण्यासाठी व्यवसायपूर्व प्रशिक्षण दिले जाते. प्रशिक्षित व अनुभवी शिक्षिका नेमून त्यांच्या कार्यक्षमतेनुसार अनेक लोकोपयोगी उत्पादने तयार केली जातात.

या उत्पादनांनी विश्वासची वेगळी ओळख देश-विदेशात निर्माण केली आहे. मुलांना समाजात सहजतेने वावरता येण्यासाठी, संवाद साधण्यासाठी आणि अधिकाधिक कौशल्ये आत्मसात करण्यासाठी सातत्याने प्रोत्साहन दिले जाते.

चित्रकला, नृत्य-नाट्यकला यांचेही प्रशिक्षण दिले जाते. कलेच्या क्षेत्रातील साचेबंद अनुकरणाऐवजी स्वनिर्मितीचा आविष्कार साधण्याचा प्रयत्न केला जातो. विविध संस्थांनी आयोजित केलेल्या अनेक स्पर्धांमध्ये मुलांनी वैयक्तिक व सांघिक पारितोषिके पटकावली आहेत.

या प्रवासात पालक परिवार, सामाजिक बांधिलकीची जाणीव असणारे हितचिंतक आणि मित्र परिवार यांचे सहकार्य विश्वासच्या कार्याला सातत्याने लाभते.